ژباړه: مانوئل پوییګ څه ډول لیکل کول؟

ژباړه / صدیق الله بدر

مانوئل پوییګ څه ډول لیکل کول؟

مانوئل پوييګ ارجنتایني ناول لیکونکی و چې په ۱۹۳۲ کال بونس آیرس ته څېرمه د خنرال ویګاس په نوم يو ښارګوټي کې زېږېدلی او په ۱۹۹۰ کې يې له دې نړۍ سترګې پټې کړې دي.

پوييګ په ماشومتوب کې له فلمونو سره ډېره لېوالتیا لرله او د دې لپاره چې په امریکايي فلمونو ښه وپوهېږي، په لس کلنی کې يې د انګلیسي ژبې زده کړې ته مخه کړه.

پوييګ تر لومړنیو زده وکړو وروسته، د بونس ایرس پوهنتون ته لاړ. له ادبیاتو، ارواپوهنې او فلسفې سره يې مینه پیدا شوه، خو دا چې غوښتل يې فلم جوړوونکی شي، روم ته لاړ. له هغه ځای نه ډېر ژر پاریس او لندن ته يې د تګ ملا وتړله او په همدې وخت کې و چې سناریو لیکل يې پیل کړل.

پوييګ امریکا ته له راستنیدو سره په داستان لیکلو پیل وکړ. "د غڼې مچه" د نوموړي يو له مشهورو آثارو څخه دی چې د هغه په بنسټ یو ښه فلم هم جوړ شوی دی.

د ریتا هيورث دوکه، له غمه ډکه تانګو، د بونس ایرس پېښه، د دې پاڼو پر لوستونکي ابدي نفرین، وصال ته د رسېدلې مينې وینه او سوزونکې شپه په لاره ده، د نوموړي نور غوره آثار دي.

د پوييګ د داستانونو ځانګړنه په دې کې ده چې په ډيالوګونو ولاړ دي. د پوييګ یو زیات شمېر ناولونه په تېره د غڼې مچه او د دې پاڼو لوستونکي ته ابدي نفرین تر ډېره له دغې ځانګړنې برخمن دي.

پاریس ریویو په ۱۹۸۸ کال له نوموړي سره یوه اوږده مرکه کړې، چې دلته یوازې د لیکلو او لیکوالۍ د تجربو په اړه د هغه د مرکې ځينې برخې درسره شریکوو.